قريباً :)

قريب انشالله بتكون في احداث هامه بحياتي ..
تتعلق بالحياة العملية والإجتماعية ..

ننتظر ونترقب .. والموقع لا يزال قيد التطوير

a7mdo is set to design a new look

[ الموود: مو ذاك الزود ]

اي نعم .. برجع حق دنيا البلوقنق واكتب مقالاتي وخواطري مره ثانيه ..

ودام ان الحماس رجعلي مره ثانيه .. لازم اسويلي تصميم يديد حق البلوق .. واكمل الصفحات والبنرات والودجات الناقصه من سنة الطفحه لي الحين !!

سـي يـوو بـ [ دماء جديده ] !!

ناشونال بانك أوف أحمدوو ..

الموود : حده مو قزرتي

[ شرايكم بالحركة !؟ بكل بوست بسويها علشان تحسون باللي احس فيه ]

للأسف .. الواحد ساعات يطوف سالفة او موقف مره او اثنين ..
بس بعدها مايصير يطوف اكثر من جذي ..

* انا مبدأي وتفكيري يقولي ان الواحد واجب عليه انه يساند اخوه بالسراء والضراء واهني الواحد يبين ويعرف منو رفيجه ومنو عدوه ..

* بس وايد يقولون الطيبه الزايده تغدر بصاحبها … وما جذبو لما قالو جذي ..

* الواحد مرات لما يقرر شي ويقرا المستقبل ،، المفروض الكل يسمع كلامه وبلا ضراط زايد ..

هـ الثلاث نقاط اللي ذكرتهم سببولي عصبيه انفنتي اليوم وللحيني معصب ومنفس عالكل .. وهالشي مو عاجبني الصراحه

عموماً هذا اللي بقلبي كتبته ومو الا احد يفهم نغزاتي او حتى يقرا البوست بس المهم اني ارتحت نفسياً ..

زين ..!!

يوم السبت بالليل قبل لا اروح عرس رفيجي رن تلفوني:-

زين: الو
احمدو: الو هلا
زين: اخ احمد؟
احمدو: وياك آمر؟
زين: معاك شركة الاتصالات “زين” حبينا نبلغك ان عندك امتحان باجر الساعه 12 ..
احمدو: اوكي! بس وين ؟
زين: في مبنى الشركة الرئيسي في الشويخ

طبعاً استانست وايد لأني قدمت عليهم يوم الخميس اللي طاف .. يعني يومين جان يدقون علي! .. رحت الأحد حق مقر الشركة ودخلت وكان معاي تقريباً 16 واحد بيقدمون الامتحان ..

الامتحان كان امتحان قدرات للغة الانجليزيه والحمدلله كان سهل .. لدرجة اني خلصته في 12 دقيقه مع ان مدته ساعه !!

الصراحه عجبني المكان وبديت افكر اتوظف عندهم جدياً … بس المشكله الوحيده مادري وين بيوظفوني وشنو وظيفتي وجم معاشي وشلون بيكون وقت دوامي؟!؟!

عموماً الله كريم .. هذي اول شركة تدق علي وتطلبني في امتحان او مقابله .. وان شاء الله باقي الشركات والبنوك بتكون وراها على طول

التعليم الواطي .. والوظيفة !

قوة شلونكم
خل اكمل سوالفي بهالايام اللي طافت ..

رجعت من اسبوعين تقريباً .. .. رحت وزارة التعليم العالي علشان يعادلونلي شهادتي واقدر اقدم على اي جهه في القطاع الحكومي ..

ولكن مثل ماقلت واظل اقوول … اللي يراجع وزارة التعليم العالي لازم يكون طويل البال ويعامل الموظفات مثل ما يعامل اخوه اللي في اولى ابتدائي !!! … اعطي الموظفه شهادتي وأقولها أبي اعادل شهادتي .. تقولي: [ ما اقدر لازم يكون عندك ورقة اثبات تخرج ] !!!!!!!!!!!!

شهادتي + كشف الدرجات مصدقه من وزارة الخارجية البريطانيه والسفارة الكويتيه في بريطانيا .. مختومه ومكتوب ان تم تصديق البيانات الواردة في الشهادة وكشف الدرجات تأكيداً لـ صحة ما ورد فيها + عندي ملف عندهم في التعليم العالي وعندهم كشف درجاتي لكل كورس ومكتوب اني راح اتخرج هالسنه .. وانا كملت عندهم شغلهم وصدقت الشهادة لأني لو بنطر بقعد شهور اذا مو سنين انطرهم يتحركون … وهم ماكو فايده !!!

اقولها انزين عطوني ورقة [ لمن يهمه الأمر ] تبين اني ناطركم تعادلون شهادتي تقولي مايصير لأن ماعندنا اثبات انك تخرجت !!!

طبعاً كبرت الموضوع ونادولي مسؤولتهم وحاولت تهديني وتقولي بندز فاكس مستعجل ونتصل عليك !! هالكلام من 8 ايام وللحين ماشفت شي من فاكسهم [ المستعجل ] !!! ،، ما اقول الا الله يعين الطالب اللي تغرب بره و رجع ولقى نفسه متغرب بديرته لو ادري انكم جذي جان درست بالكويت لا معادلة ولا بطيخ اول ماتتخرج تقدم اي مكان تبي بدون اوراق زايده ،، هم تحافظ عالبيئة وهم تتوظف بسرعه [ اهم شي تحافظ عالبيئة هههههههههه ] !!

للعلم: انا كنت اقدر اقدم مع الدفعه اللي طافت في ديوان الخدمة المدنيه للتوظيف في الجهات الحكوميه ،، لأن تقديم الاوراق يتم بعد ما تطلع الاسامي ،، والاسامي طلعت والربع اللي عندهم دبلوم توظفوا ،، وانا خريج البكارليوس من بريطانيا حتى لو قبلوني مكان يعطوني مهله اسبوعين اخلص اوراقي واذا ماخلصوني التعليم العالي بيروح علي القبول !!! يعني الحمدلله حفظت ماي ويهي وماقدمت مع الدفعه اللي طافت !!

***

عموماً ،، انا مانطرتهم ،، ورحت اشوف القطاع الخاص اللي يقبل الشهادة بدون مايتم معادلتها من الوزارة دام انها مصدقة من السفارة الكويتية ،، ولحسن حظي كانو مسوين معرض للفرص الوظيفيه الاسبوع اللي طاف وكل الشركات الكبيرة والبنوك كانت هناك .. و قدّمت على اللي أكو واللي ماكو .. .. وننطر وان شاء الله خير

في المعرض كان اكو معهد للغة الانجليزيه يعطي امتحان مجاني مدته ربع ساعه يحدد المستوى باللغه الانجليزيه ،، واكثر الشركات اللي هناك كانت تطلب درجة هالامتحان .. أول شي سويته اهناك قدمت على هذا الامتحان ،، ويبت فيه 7 من 8

وفيه معرض للفرص الوظيفية ثاني ،، راح يكون يومي الثلاثا والاربعا الياي ،، بكلية الهندسه بجامعة الكويت ،، حياكم معاي اذا بطاليه ونفس الحال

***

باجر عرس رفيجي عليوي ،، واهو ثاني واحد من ربعي اللي من ايام الطفوله يتزوج ،، نقووله مبرووك وعقبالي

Done Deal

قوة بلوقرز شلونكم ..
عساكم بخير..؟!

آسف على الغيبه قلتلكم ان عندي سوالف وايد بقوله من فتره بس ماقدرت ادخل لأني سافرت بريطانيا .. سافرت يوم الاحد اللي طاف ورجعتي انشالله يوم الاحد الياي يعني بعد 3 ايام

خلال هالـ 3 أيام كنت مشغول حدي لأن مافي وقت أبداً الواحد يقدر يحك راسه .. اول شي أخذت شهادتي ورحت لندن أصدق شهادتي في وزارة الخارجيه البريطانيه وبعدها في السفاره … والحمدلله كل شي مشى على مايرام .. وخلصت شغلي في غضون 3 ايام بالضبط مثل ما انا كنت مخطط .. يعني Done Deal

امس رجعت من لندن الساعه 8 تقريباً وصلت وتلي بيي (Whitley Bay) .. منطقة سياحيه ساحليه في شمال انجلترا .. واهي المنطقه اللي انا ساكن فيها هاليومين على ما اخلص شغلي .. المهم وصلت وعلى طول نمت من التعب وقعدت من النوم الساعه 10 ونص الصبح ..

اليوم كان اول يوم افرغ فيه .. من الصبح لي الليل تسوّق اشتري صوايغ حق الاهل والربع .. وللحين ماخلصت باجر انشالله بروح سوق ثاني علشان اشتري عطور وبعض الهدايا اللي وصوني فيها الاهل

الجو حلو في هالاسبوع والحمدلله .. توقعت اشوف امطار غزيرة ولكن لي هاللحظه مامطرت الا مره وحده وكان مطر خفيف .. مجرد قطرات ..

يعني بإختصار انا بهاليومين “مغير جو” .. الحمدلله احس بالراحه الحين بعد ايام من التعب والمشاكل اللي واجهتني في الفتره الاخيره خصوصاً المشاكل العاطفيه اللي صارتلي في العيد واللي مقرر اقرق لكم عنها بالتفصيل ان شاء الله خلال الايام القليله اليايه .. الحين مايمديني اقول شي لأني شابك من انترنت كافيه قريب من الفندق .. يلا عن اذنكم .. سي يووو

“أوّل غـيـــــر” !!

قوة .. شلونكم شخباركم شمسويين عساكم بخير ..
تقبل الله طاعتكم وكل عام وانتو بخير ..
شلون العيد معاكم مرتاحين ان شاء الله؟؟

انا اول مره اعيّد مع اهلي من 4 سنين لأني كنت ادرس بره .. والعيد تغيّر وايد للأسف عن قبل .. التزاور بين الاهل صار اقل من يوم والباجي طلعات وزحمه بالشوارع الواحد يمشي مشوار 10 دقايق بـ ساعة !!

بـ ثاني يوم العيد [ أمس ] .. زرت العالم الفلكي الكويتي المشهور الدكتور صالح العجيري .. وعايدت عليه وسألته .. شلون العيد معاك؟! أوصفلنا ايام العيد لما كنت شباب .. رد علي بـ نبره صوت فيها شوية شوق لـ حنين الماضي :p وقال: “أوّل غيــر ،، على ايام شبابي كنا ما ننام بليلة العيد ونلبس دشاديشنا اليديده من الليل ونكشخ وننطر صلاة العيد في المسيد نقرا قرآن ونكبر ليي وقت الصلاة وبعدها نتزاور ونشوف اهلنا وحبايبنا .. واللي زعلان نراضيه ،، واللي زعلانين منه نطيّح الحطب معاه .. الله يرد هالأيام لكم ان شاء الله وهالله هالله بالعادات الأصيله يا احمدوو”

كلامه أثر فيني الصراحه .. وقلتله اني حسيت بالفرق بالـ 4 سنين اللي مرت ،، والصراحه اوافقه على كل حرف قاله ..

المهم خلونا من الماضي .. وتعالو اقولكم شصار معاي في اليومين اللي طافوو ..

طبعاً انا سويت مثل ماسوا العجيري قبل ،، واصلت لي صلاة العيد ورحت المسيد وصليت وعايدت على اللي معاي في المسيد ،، وبعدها رحت زرت اهلي وعمامي وخوالي .. وفي اليوم الثاني الزواره كانت غدا في بيت عمي وبعدها الكل طلع !! وانا امري لله طلعت مع ربعي .. رحنا السينما .. واليوم كان ثقيل لأني مانمت من اول يوم العيد .. وجسمي متكسر حده ..

عن نفسي للحين احس بطعم العيد .. ولكن الناس اللي حوالي ماقاامت تهتم بهالمناسبة السعيدة على قلووب المسلمين كثر ما تستحق .. يمكن علشان العام الدراسي بالكويت يبدي بعد العيد مباشرةً والناس قامت تضيع شوي وماتدري تركز بالعيد ولا بالإستعداد للدراسة ..

اتمنى ان هذا هو السبب .. وهالله هالله بالأهل وصلة الرحم .. وان شاء الله نرد مثل أوّل .. لأن مثل ماقالولي العيد أوّل غـيــــــــر ..

عـيـدكـم مـبـارك .. !

والسموحه عالغيبه عندي لكم سوالف وايده انشالله اقولها لكم قريباً

تغيير جـو ..

اليوم وأخيراً طلعت مع ربعي لأول مره في رمضان!
هالسنه ماشفتهم كلش في رمضان بس دقيت عليهم وباركت بأول الشهر!! مو من عوايدي انا أحمدوو اللي 24 ساعه هايت !! خخخخخخ

المهم .. مريت عليهم واحد واحد كل واحد كان بزوارته اللي رايح بيت يده واللي رايح بيت عمه .. خذيتهم علشان نروح نتسحر
عقب مامريتهم قعدنا نسوي قرعه اي مطعم نروح خخخخخ

بعدها رحنا فدركرز اللي عالبحر .. تسحرنا وخلصنا .. وقال واحد من الشباب انه بيقعدون في الديوانيه اليوم .. رجعت البيت اخذت لابتوبي علشان اشبك بس للأسف الوايرلس عنده لازم باسوورد وراعي الديوانيه ناسي الباسوورد .. باقي الشباب شابكين لأنهم مسيفين الباسوورد من زمان اما انا لأني توني متخرج و راد  .. فـ عمري ماطبيت في هالديوانيه اللي رحتلها اليوم.

المهم .. قعدنا لي صلاة الفير صلينا ورديت البيت ..

شبكت والمسنجر كان عامر والعالم شابكه .. غير العاده .. كلمت ربعي اللي من زمان ماشفتهم ..

وبس هذا اختصار شديد لـ يومي .. اللي اعتبره فعلاً [ تغيير جو ] ..

هابي بييثردي توو عـلاّاااو .. تشا تشا تشا !!

اليوم 10 سبتمبر يصادف عيد ميلاد اخوي العنونو علاوي .. صار عمره 7 سنين من قده توه شبااااااااااب [ الل يسمعني يقول صكيت الألف خخخ ] ..
للحين محد قاله هبي بيرثدي لأنه نايم وباجر و وراه مدرسه والحين الساعه 5 الا ربع الفير ..
يمديني باجر اشتريله هديه و كيكه لأن مثل ماتدروون اللي بعمره لااازم هديه ولا يقلب عيد ميلاده عزااا خخخ ..

على طاري علاوي .. صارله يومين مداوم صار بـ ثانيه أبتدائي [ الصف الثاني ] ..
امس قعدت اطالع كتبه اللي عطوه اياها .. والله العظييم الكتب وااايد حق واحد بثانيه ابتدائي!!

انا اذكر ثانيه ابتدائي موادي كانت: عربي دين حساب علوم + مواد اللعب اللي اهي رياضه و رسم وموسيقى
الحين التعليم تطور والكتب زادت وعيالنا قاموا يحدبوون من واهما صغار !!

وهذي لستة الكتب:-
العربي كتابين .. قواعد ونحو من ثانيه ابتدائي!! جنها قويه!! اهو الكتابه ماعلمووه الا كلمات هالمره قواعد!!
كتابين علوم وكتابين رياضيات … واحد يحلون فيه والثاني يقرون فيه .. اسراف اوراق
حاسوب .. مو تدرون عصر الكمبيوتر لازم حاسوب من اول شي علشان باجر يدوخنا يقوول ابي لابتوب ابي انترنت ابي بلوق
اجتماعيات !!!! .. هذي قويه!! انا الاجتماعيات على ايامي كانت من 4 ابتدائي وكان المنهج عن الكويت والمحافظات والشيوخ .. هذا من الحين بدا ياخذ اللي خذيته برابعه!!
انجليزي .. طبعاً الانجليزي الحين صار من اولى ابتدائي وعلى ايامي الانجليزي من اولى متوسط!! وعلاوي مشكلته الانجليزي لأن مافي احد يدرسه هالماده خصوصاً اني كنت ادرس بره بس انشالله هالسنه بخليه يصير فلته بالانجليزي خخخخ
الاسلاميه + القرآن .. شي حلوو ان نشووف مادة قرآن منفصله عن الاسلاميه ويحفظونهم القرآن كل سنه سور اكبر من اللي قبلها .. على ايامنا كان كانوا ماده وحده ونحفظ تقريباً 10 ايات من سوره طويله فقط لاغير

+

المفاجأه الكبرى .. ماده يديده ! اسمها مهارات حياتيه !! وهالمادة بروحها فيها 4 كتب!!
مهارات حياتيه في تكوين الصداقات
مهارات حياتيه في حب الوطن
مهارات حياتيه في التعامل مع المؤسسات الطبيه !!! [ الولد بثانيه شعرفه بمؤسسات وشركاات!! :O ]
مهارات حياتيه في مادري شنو [ تكملة عدد!! ]

غير هالكتب يبون حق كل ماده دفتر او دفترين [ صفي ولا صفي ] ..
انا عن نفسي من الحين شاري بالبيت اجهزه حق شد الظهر والجسم وتدليك وبعطيهم علاوي كل يوم اول مايرجع من دوامه !!

بالنهايه اقول هابي بيرثدي يا علاوي وان شاء الله لما يعلموونك القرايه والكتابه دش بلوقي و رد على هالتدوينه !!!